ކޮސްޓަ ރިކާއަކީ އުތުރު އެމެރިކާގެ ތިންވަނައަށް އެންމެ ކާމިޔާބު ޓީމެވެ. ނަމަވެސް އެ ޓީމަކީ ވޯލްޑްކަޕްގައި އެހާ ކާމިޔާބު ޓީމެއް ނޫނެވެ. އެ ޓީމު ފާހަގަ ވަނީ ބޮޑަށް ޑިފެންސިވް ގޭމެއް ކުޅޭ ޓީމެއްގެ ގޮތުގައެވެ. އަދި ޓީމުގެ އެންމެ ވަރުގަދަ ޑިޕާޓުމެންޓެއްގެ ގޮތުގައި ވެސް ފާހަގަކޮށްލެވެނީ ޑިފެންސްލައިނެވެ.
ކޮސްޓަ ރިކާ ލީގުގެ އަލަޖުއެލެންސްއަށް ކުޅޭ ބްރަޔަން ރުއިޒް އަކީ ކޮންކާކަފް ސަރަހައްދުގައި ފާހަގަކޮށްލެވޭ މޮޅު ކުޅުންތެރިއެކެވެ. އޭނާ ވަނީ ކޮސްޓަ ރިކާ ގައުމީ ޓީމަށް މިހާތަނަށް 143 މެޗު ކުޅެ 29 ގޯލު ޖަހައިފައެވެ. މިއީ، އެޓޭކިން މިޑްފީލްޑަރެއްގެ ގޮތުގައި ކުޅޭ އުމުރުން 37 އަހަރުގެ ބްރަޔަންގެ އެންމެ ފަހު ވޯލްޑްކަޕެވެ.
މިއަހަރު ވޯލްޑްކަޕްގައި ކޮސްޓަ ރީކާ ޓީމަށް އިރުޝާދު ދޭނީ ކޮލަމްބިއާގެ ލުއިސް ފެނާންޑޯއެވެ. އޭނާ އަކީ ވޯލްޑްކަޕްގެ ތަޖުރިބާހުރި މޮޅު ކޯޗެކެވެ. އޭނާ ވަނީ 2006 ވަނަ އަހަރުގެ ވޯލްޑްކަޕްގައި އެކުއެޑޯގެ ކޯޗެއްގެ ގޮތުން މަސައްކަތްކޮށް އެ ޓީމު މުޅިން އަލަށް ގަދަ 16އަށް ގެންގޮސްދީފައެވެ. މީގެ އިތުރުން ލުއިސް ވަނީ ހޮންޑިއުރަސްގެ ކޯޗެއްގެ ގޮތުގައި ވެސް މަސައްކަތްކޮށްފައެވެ.
ކޮސްޓަ ރިކާ ޓީމުގެ އެންމެ މުހިއްމު އަދި އެންމެ ތަޖުރިބާކާރު އެއް ކުޅުންތެރިއަކަށްވަނީ ކޭލާ ނަވާސްއެވެ. އޭނާއަކީ ފްރާންސްގެ ޕީއެސްޖީއަށް ކުޅޭ ގޯލްކީޕަރެކެވެ. މީގެއިތުރުން އޭނާއަކީ ރެއާލް މެޑްރިޑްއަށް ވެސް ކުޅުނު ކީޕަރެކެވެ. އެގޮތުން އެ ޓީމުން ޖެހިޖެހިގެން ތިން ފަހަރު ޗެމްޕިއަންސް ލީގު ކާމިޔާބުކުރި އިރު ގޯލު ބަލަހައްޓާފައިވަނީ ނަވާސްއެވެ. އޭނާ ވަނީ ކޮސްޓަ ރިކާ ގައުމީ ޓީމަށް 107 މެޗު ކުޅެދީފައެވެ.
