ޖަރުމަނުގެ ކެޕްޓަނަކީ 2014 ވަނަ އަހަރުގެ ޗެމްޕިއަން ޓީމުގައިވެސް ހިމެނުނު ތަޖުރިބާކާރު ކީޕަރު މެނުއަލް ނޯޔާ އެވެ. ޖަރުމަނުގެ ބުންޑަސްލީގާގައި ތަކުރާރުކޮށް މޮޅު ކުޅުމެއް ދައްކަމުން އަންނަ ނޯޔާއަކީ ދުނިޔޭގެ އެންމެމޮޅެތި ކީޕަރުންގެ ލިސްޓުގެ އެންމެ ކުރިން ޖާގަ ލިބޭ ކުޅުންތެރިއެކެވެ. އުމުރުން 36 އަހަރުގެ ނޯޔާ ވަނީ ޖަރުމަނު ގައުމީ ޓީމަށް 113 މެޗު ކުޅެދީފައެވެ.

ޖަރުމަނު ޓީމުގެ މިފަހަރުގެ ކޯޗަކީ އޮގަސްޓު 2006 އިން ޖުލައި 2014 ގެ ނިޔަލަށް އެޓީމުގެ ކުރީގެ ކޯޗް ޔޯކިމް ލޯގެ އެސިސްޓެންޓު ކޯޗްކަން ކުރި ހެންސީ ފްލިކެވެ. ޖަރުމަނުގެ ކްލަބް ބަޔާން މިޔުނިކްގެ ކާމިޔާބު ކޯޗް ޖަރުމަނުގެ ގައުމީ ޓީމާއި ހަވާލުވީ 2021 ވަނަ އަހަރުގެ ތެރޭގައެވެ. އޭނާ ބަޔާން ދޫކޮށްލީ ބަޔާންގެ ތާރީހުގައި ވެސް އެ ޓީމަށް އެންމެ ބިޑު ކާމިޔާބީ ހޯދައިދިނުމަށް ފަހުގައެވެ. އެ ޓީމު 2020 ވަނަ އަހަރު ކުޅުނު ހުރިހާ މުބާރާތެއް އޭނާ އެ ޓީމަށް ކާމިޔާބުކޮށްދިނެވެ.

ޖަރުމަނު ޓީމުގެ އެންމެ މުހިއްމު އެއް ކުޅުން ތެރިޔަކީ ސްޕެނިޝްގެ ރިއަލް މެޑްރިޑަށްވެސް މޮޅު ކުޅުމެއް ދައްކަމުން އަންނަ ސެންޓަރ ބެކް، އެންޓޯނިއޯ ރުޑިގާއެވެ. ރުޑިގާ ފާހަގަ ވެފައިވަނީ ވަރުގަދަ، ގޮތް ދޫ ނުކުރާ އަދި އިސްނަގާ މޮޅު ކުޅުންތެރިއެއްގެ ގޮތުގައެވެ. ޑިފެންސިވްގެ އިތުރުން އެޓޭކިންގައިވެސް ރުޑިގާ އަކީ މޮޅު ކުޅުންތެރިޔެކެވެ. މިއަހަރުގެ ވޯލްޑް ކަޕަކީ ރުޑިގާގެ ދެވަނަ ވޯލްޑް ކަޕެވެ. މި މުބާރާތުގައި އޭނާގެ ފަރާތުން މޮޅު ކުޅުމެއް ފެންނާނެ ކަމަށް ބެލެވެއެވެ.