ދުނިޔޭގެ އެންމެ މޮޅު އެއް ކުޅުންތެރިޔާ ކްރިސްޓިއާނޯ ރޮނާލްޑޯއަކީ ޕޯޗުގަލް ޓީމުގެ ކެޕްޓަނެވެ. ބައިނަލްއަގްވާމީ ފުޓުބޯޅައިގައި އެންމެ ގިނަ ގޯލު ޖަހައިފައިވާ ރޮނާލްޑޯގެ ފުޓުބޯޅަ ކެރިއަރު ނިމުމަކާ ހަމައަށް އަންނައިރު އޭނާއަށް މިއަހަރުގެ ވޯލްޑްކަޕް ހާއްސައެވެ. އުމުރުން 37 އަހަރުގެ ރޮނާލްޑޯގެ އެންމެ ފަހު ވޯލްޑްކަޕަށް މި މުބާރާތް ވެދާނެކަމަށް ބެލެވޭއިރު، ވޯލްޑްކަޕަކާއެކު ކެރިއަރު ނިންމާލަން އޭނާއާއި އޭނާގެ ސަޕޯޓަރުން ވެސް ބޭނުންވެއެވެ. ރޮނާލްޑޯ ވަނީ ޕޯޗުގަލް ގައުމީ ޓީމަށް 191 މެޗު ކުޅެ، 117 ގޯލު ޖަހައިފައެވެ.

އުމުރުން 67 އަހަރުގެ ފެނާންޑޯ ސަންޓޯސް އަކީ ޕޯޗުގަލްގެ ގައުމީ ޓީމުގެ ކޯޗެވެ. އޭނާ ޕޯޗުގަލްގެ ކޯޗުކަމާ ހަވާލުވީ 2014 ވަނަ އަހަރުއެވެ. އޭގެ ކުރިން ސަންޓޯސް ވަނީ ގްރީސްގެ ގައުމީ ޓީމުގެ އިތުރުން ޕޯޗުގަލްގެ ބެންފިކާގެ ކޯޗެއްގެ ގޮތުގައި މަސައްކަތްކޮށްފައެވެ. ސަންޓޯސް ވަނީ ޕޯޗުގަލްއަށް 2016 ވަނަ އަހަރުގެ ޔޫރޯ ކާމިޔާބުކޮށްދީފައެވެ.

ޕޯޗުގަލް ގައުމީ ޓީމުގެ އެންމެ މުހިއްމު އެއް ކުޅުންތެރިއަކީ މެންޗެސްޓާ ސިޓީއަށް ކުޅެމުން އަންނަ ހުނަރުވެރި މިޑްފީލްޑަރު ބަނާޑޯ ސިލްވާއެވެ. އޭނާއަކީ ޓީމުގެ އެޓޭކްތައް އުފެއްދުމުގެ އިސް މޭސްތިރިޔާއެވެ. ބަނާޑޯގެ މޮޅު ކުޅުމުގެ ސަބަބުން މިހާރު ވެސް ގިނަ ކުލަބުތަކަކުން ދަނީ އޭނާއަށް ފާރަލަމުންނެވެ. އުމުރުން 28 އަހަރުގެ ބަނާޑޯ ޕޯޗުގަލްގެ ގައުމީ ޓީމަށް ކުޅެން ފެށީ 2015 ވަނަ އަހަރުއެވެ. މިހާތަނަށް އޭނާ ވަނީ ގައުމީ ޓީމަށް 72 މެޗު ކުޅެ އަށް ގޯލު ޖަހައިފައެވެ.