އެޑެން ހަޒާޑް ވަނީ ބެލްޖިއަމަށް 122 މެޗު ކުޅެދީ 33 ގޯލް ޖަހައިދީފައެވެ. އަނިޔާގެ ސަބަބުން ފާއިތުވި ދެ ސީޒަނުގައި ހަޒާޑަށް ނުކުޅެވުނަސް އޭނާއަކީ ފޯމުގައި ހުރި އިރު ވަރަށް މޮޅަށް ކުޅޭ ކުޅުންތެރިއެކެވެ. އޭނާ ކުޅެނީ ކްލަބް ފުޓްބޯޅައިގައި ދުނިޔޭގެ ގަދަބާރު ރެއަލް މެޑްރިޑްއަށެވެ. އޭނާ އަކީ 2018 ވަނަ އަހަރުގެ ވޯލްޑް ކަޕްގައި ބެލްޖިއަމަށް ތިން ވަނަ ހޯދައިދިނުމުގައި މުހިއްމު ދައުރެއް އަދާކުރި ކުޅުންތެރިޔެކެވެ. އެގޮތުން އެ އަހަރު ހަޒާޑް ވަނީ އެފަހަރުގެ މުބާރާތުގެ ދެވަނައަށް އެންމެ މޮޅު ކުޅުންތެރިޔާއަށް ދޭ ސިލްވާ ބޯލް ހާސިލްކޮށްފައެވެ.

ސްޕެއިންގެ ރޯބާޓޯ މާޓިނޭޒް އަކީ މިހާތަނަށް ބެލްޖިމްއިން ވޯލްޑް ކަޕެއްގައި ހޯދި އެންމެ ރަނގަޅު ނަތީޖާ އެ ޓީމަށް ހޯދައިދިން ކޯޗެވެ. އެގޮތުން 2018 ވަނަ އަހަރު ބެލްޖިއަމްގެ ޓީމުން ވޯލްޑް ކަޕުގައި ހޯދި ތިންވަނަ އަކީ ބްލެޖިއަމްގެ ތާރީހުގައިވެސް އެޓީމުން ވޯލްޑް ކަޕުގައި ހޯދި އެންމެ ބޮޑު ކާމިޔާބީއެވެ. ދެހާސް ސޯޅަ ވަނަ އަހަރު ބެލްޖިއަމްގެ ގައުމީ ޓީމާ ހަވާލުވި ރޮބާޓޯ ވަނީ އެޓީމަށް 2018 ވަނަ އަހަރުގެ ވޯލްޑް ކަޕްގެ އިތުރުން، 2020 ވަނަ އަހަރުގެ ޔޫރޯގެ ކޯޗްކަން ކޮށްދީފައެވެ.

ދުނިޔޭގެ އެންމެ މޮޅު ކުޅުންތެރިންގެ ތެރޭގައި ހިމެނޭ ކެވިން އޭނާގެ އިންޓަނޭޝަނަލް ފުލް ކެރިއަރު ފެށީ 2010 ވަނަ އަހަރުއެވެ. އިނގިރޭސި ކްލަބް ފުޓްބޯޅައިގެ ރަސްކަން ކުރާ މެންޗެސްޓާ ސިޓީއަށް ކުޅޭ ހުނަރުވެރި މިޑްފިލްޑަރު ކެވިން ޑެ ބްރުއިން އަކީ ބެލްޖިއަމްގެ ޓީމުގެ އެންމެ މުހިއްމު އެއް ކުޅުންތެރިޔާއެވެ. ކެވިން އަކީ ދުރު ޕާސްތައް ޖެހުމާއި އެރިއާ ބޭރުންވެސް ގޯލު ޖެހުމުގައި ފާހަގަވާ ކުޅުންތެރިއެކެވެ. ބެލްޖިއަމަށް ކުޅެދިން 93 މެޗުގައި 25 ގޯލް ޖަހާފައިވާ ކެވިން އަކީ 2014 ވަނަ އަހަރުގެ ވޯލްޑް ކަޕް އަދި 2016 ވަނަ އަހަރުގެ ޔޫރޯގައި ބެލްޖިއަމްގެ ޓީމް ކުއާޓާ ފައިނަލަށް ކުރި ދަތުރުގައި މުހިއްމު ދައުރެއް އަދާ ކުރި ކުޅުންތެރިއެކެވެ.